ആരാധകർ ഏറെ പ്രതീക്ഷയോടെ കാത്തിരിക്കുന്ന അൽഫോൻസ് പുത്രൻ ചിത്രം ഗോൾഡ് ഡിസംബറിൽ റിലീസ് ചെയ്യുമെന്ന് നടൻ ബാബുരാജ്. പൃഥ്വിരാജുമൊത്ത് ലൊക്കേഷനിൽ നിന്നുള്ള ചിത്രം പങ്കുവച്ചായിരുന്നു താരം റിലീസിനെക്കുറിച്ചുള്ള പുതിയ വിവരം സമൂഹമാധ്യമത്തിൽ പങ്കുവച്ചത്.
‘‘ഗോൾഡ്...കാത്തിരിക്കുന്നു. പെർഫെക്‌ഷനു വേണ്ടി എത്ര നാളുകൾ. അത് പൂർത്തിയായിരിക്കുന്നു. അൽഫോൻസ് പുത്രനും ടീമിനും അഭിനന്ദനങ്ങൾ. ഡിസംബർ റിലീസ്.’’- ബാബുരാജ് കുറിച്ചു.
'പ്രേമം' സിനിമയ്ക്കു ശേഷം അൽഫോൻസ് പുത്രൻ സംവിധാനം ചെയ്യുന്ന ചിത്രമാണ് 'ഗോൾഡ്'. മാർ‍ച്ചിലാണ് സിനിമയുടെ ആദ്യ ടീസർ പുറത്തിറങ്ങുന്നത്. ഈ ഓണത്തിന് ചിത്രം തിയറ്ററുകളിലെത്തുമെന്ന് പ്രഖ്യാപിച്ചിരുന്നെങ്കിലും ഓരോ കാരണങ്ങളാല്‍ റിലീസ് നീട്ടുകയായിരുന്നു. സിനിമയിൽ കുറച്ച് മിനുക്ക് പണികള്‍ കൂടി ബാക്കിയുണ്ടെന്നും റെഡി ആകുന്നുവെന്നുമായിരുന്നു ഗോൾഡ് റിലീസ് കമന്‍റുകളോട് അൽഫോൻസിന്‍റെ മറുപടി.
ബാബുരാജിന്‍റെ പോസ്റ്റിനു താഴെയും നിരവധി കമന്‍റുകളാണ് വരുന്നത്. ബാബുരാജേട്ടനെ വിശ്വാസമാണെങ്കിലും അൽഫോൻസ് പുത്രന്ഞറെ ഉറപ്പു കിട്ടാതെ ഇക്കാര്യം വിശ്വസിക്കില്ലെന്നാണ് ആരാധകർ കമന്‍റു ചെയ്യുന്നത്. പൃഥ്വിരാജ് പ്രൊഡക്‌ഷൻസ്, മാജിക് ഫ്രയിംസ് എന്നിവരാണ് ചിത്രത്തിന്‍റെ നിർമാതാക്കൾ.
