സംവിധായകൻ റോഷൻ ആൻഡ്രൂസ് ബോളിവുഡിലേക്ക്. സൂപ്പർ താരം ഷാഹിദ് കപൂറിനെ നായകനാക്കിയാകും അദ്ദേഹം തന്റെ അരങ്ങേറ്റ ചിത്രം ഒരുക്കുക. ബോബി-സഞ്ജയ് ടീമിന്റേതാണ് ചിത്രത്തിന്റെ തിരക്കഥ. ഹിന്ദിയിൽ സംഭാഷണമെഴുതുന്നത് ഹുസൈൻ ദലാൽ. സിദ്ധാർഥ് റോയ് കപൂറാണ് ചിത്രം നിർമിക്കുക.
2023 മാർച്ചിൽ ചിത്രത്തിന്റെ ഷൂട്ടിംഗ് ആരംഭിക്കും. ഉദയനാണ് താരം എന്ന ചിത്രം സംവിധാനം ചെയ്തുകൊണ്ടാണ് റോഷൻ മലയാള സിനിമയിൽ തന്റെ സാന്നിധ്യം ഉറപ്പിച്ചത്. വന്പൻ ഹിറ്റായിരുന്ന ചിത്രം പ്രേക്ഷകർ ഇരുകൈയും നീട്ടി സ്വീകരിച്ചു.
മുംബൈ പൊലീസ്, നോട്ട് ബുക്ക്, കായംകുളം കൊച്ചുണ്ണി, ഹൗ ഓൾഡ് ആർ യു തുടങ്ങി നിരവധി സിനിമകൾ റോഷന്റേതായി പിറവിയെടുത്തു. ഹൗ ഓൾഡ് ആർ യു സിനിമയുടെ തമിഴ് പതിപ്പായ 36 വയതിനിലൂടെ തമിഴിലും റോഷൻ ആൻഡ്രൂസ് ശ്രദ്ധനേടി.
""ഈ പോസ്റ്റിന് നന്ദി. കഴിഞ്ഞ 17 വര്ഷമായി എന്നെയും എന്റെ സിനിമകളെയും പിന്തുണയ്ക്കുന്നതിനും നന്ദി. വിജയവും പരാജയവും ഗെയിമിന്റെ ഭാഗമാണ്. നമ്മള് നമ്മുടെ വിജയത്തെ ആഘോഷിക്കുന്നത് പോലെ തന്നെ പരാജയങ്ങളെ സ്വീകരിക്കുന്നതും എപ്പോഴും നല്ലതാണ്.
ഞാന് തിരിച്ച് വരും. എന്റെ അടുത്ത ചിത്രം മാര്ച്ചില് ആരംഭിക്കുകയാണ്. ബോബി-സഞ്ജയ്, ഹുസൈന് ദലാല് എന്നിവരാണ് തിരക്കഥ. സിദ്ധാര്ത്ഥ് റോയ് കപൂര് നിർമാണവും.’’ കഴിഞ്ഞദിവസം റോഷൻ ആൻഡ്രൂസ് സമൂഹമാധ്യമത്തിൽ കുറിച്ചു.