ആസ്വാദകരെ മനസ് നിറയെ പൊട്ടിച്ചിരിപ്പിച്ച ജയ ജയ ജയ ജയ ഹേ സിനിമ പോലെ തന്നെയായിരുന്നു ചിത്രത്തിന്‍റെ ചിത്രീകരണവുമെന്ന് കാണിച്ചു തരികയാണ് ചിത്രത്തിന്‍റെ മേക്കിംഗ് വീഡിയോ. ഷൂട്ടിംഗ് സമയത്തും അണിയറപ്രവർത്തകരും അഭിനേതാക്കളും ഓരോ സീൻ കഴിയുന്പോഴും പൊട്ടിചിരിക്കുന്ന കാഴ്ചയാണ് ഇപ്പോൾ പുറത്തുവന്നിരിക്കുന്നത്.
ജയയും രാജേഷുമൊന്നിച്ചുള്ള കോന്പിനേഷൻ സീനുകൾ ചിത്രീകരിക്കുന്പോൾ ഇരുവരും പൊട്ടിചിരിക്കുന്നത് വീഡിയോയിൽ കാണാം. ഇവർക്കൊപ്പം അണിയറ പ്രവർത്തകരുടെ മുഖത്തും ചിരി പടരുന്നുണ്ട്. ബേസിലും ദർശന രാജേന്ദ്രനും പ്രധാന വേഷത്തിലെത്തിയ ചിത്രത്തിന് വൻ പ്രേക്ഷക പിന്തുണയാണ് ലഭിച്ചിരിക്കുന്നത്. വിപിൻ ദാസാണ് ചിത്രം സംവിധാനം ചെയ്തിരിക്കുന്നത്.
ഒക്ടോബർ 28നാണ് 'ജയ ജയ ജയ ജയ ഹേ' റിലീസ് ചെയ്തത്. അജു വർഗീസ്, അസീസ് നെടുമങ്ങാട്, സുധീർ പരവൂർ, മഞ്‍ജു പിള്ള, ശരത് സഭ, ഹരീഷ് പെങ്ങൻ എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്.
അങ്കിത് മേനോൻ സംഗീത സംവിധാനം നിര്‍വഹിച്ചിരിക്കുന്ന ചിത്രത്തിന്‍റെ ഗാനരചന വിനായക് ശശികുമാറാണ്. ഛായാഗ്രഹണം ബാബ്‍ലു അജുവാണ്. ചിത്രസംയോജനം ജോണ്‍ കുട്ടി.
