ജീത്തു ജോസഫ് ഒരുക്കുന്ന ത്രില്ലർ ചിത്രം "കൂമൻ' നവംബർ നാലിന് തീയേറ്ററുകളിലെത്തും. ആസിഫ് അലി നായകനായി എത്തുന്ന ചിത്രത്തിന്റെ ട്രെയിലറും അണിയറപ്രവർത്തകർ പുറത്തുവിട്ടു.
ട്രെയിലറിൽ "ദൃശ്യ'മാകുന്ന നെടുന്പാറ എന്ന പോലീസ് സ്റ്റേഷനും കുറ്റകൃത്യം നടന്ന ഒരു വീടും പുതിയ കാണികളെ ആകാംക്ഷാഭരിതരാക്കുന്നതാണ്. കുറ്റാന്വേഷണ രംഗങ്ങളും പോലീസ് ഉദ്യോഗസ്ഥരുടെ ആത്മസംഘർഷങ്ങളും "കൂമനി'ൽ പ്രതിപാദ്യ വിഷയമാകും.
ഗിരിശങ്കർ എന്ന സിവിൽ പോലീസ് ഓഫീസറായി എത്തുന്ന ആസിഫ് അലിക്കൊപ്പം ഹന്ന റെജി കോശി, രഞ്ജി പണിക്കർ, ബാബുരാജ് എന്നിവരും ചിത്രത്തിൽ അണിനിരക്കുന്നു.
മാജിക്ക് ഫ്രെയിംസ് - അനന്യ ഫിലിംസ് ബാനറിൽ ലിസ്റ്റിൻ സ്റ്റീഫനും ആൽവിൻ ആന്റണിയും ചേർന്ന് നിർമിക്കുന്ന ചിത്രത്തിന്റെ തിരക്കഥ ഒരുക്കുന്നത് മോഹൻലാൽ ചിത്രം ട്വൽത്ത് മാൻ രചിച്ച കെ. ആർ. കൃഷ്ണകുമാറാണ്. സതീഷ് കുറുപ്പ് ഛായാഗ്രഹണവും വി. എസ്. വിനായക് ചിത്രസംയോജനവും നിർവഹിക്കുന്നു.