നർമത്തിലൂടെ മലയാള സിനിമ ആസ്വാദകര്‍ക്കെല്ലാം പ്രിയപ്പെട്ട നടിയായി മാറിയ മോളി കണ്ണമാലി ഇംഗ്ലീഷ് സിനിമയില്‍ അഭിനയിക്കുന്നു. ഓസ്‌ട്രേലിയന്‍ ചലച്ചിത്ര രംഗത്ത് പ്രവര്‍ത്തിക്കുന്ന മലയാളി ജോയ് കെ. മാത്യു സംവിധാനം ചെയ്യുന്ന ചിത്രത്തിലൂടെയാണ് മോളി ഇംഗ്ലീഷ് സിനിമയുടെ ഭാഗമാകുന്നത്.
ടുമോറോ എന്നാണ് ചിത്രത്തിന്‍റെ പേര്. സിനിമയുടെ ചിത്രീകരണം തിരുവനന്തപുരത്ത് തുടങ്ങി. ഏഴ് കഥകള്‍ ഉള്‍പെടുത്തി ഒരുക്കുന്ന ആന്തോളജി ചിത്രത്തില്‍ രാജ്യാന്തര താരങ്ങളാണ് അഭിനയിക്കുന്നത്. സ്‌നേഹത്തിന്‍റെയും സഹായ സഹകരണത്തിന്‍റെയും പ്രതീകമാകുന്ന മനുഷ്യരുടെ കഥയാണ് ചിത്രം പറയുന്നത്.
മോളി കണ്ണമാലിയെക്കൂടാതെ ടാസോ, റ്റിസ്റ്റി, ജോയ് കെ. മാത്യു, എലൈസ്, ഹെലന്‍, സാസ്‌കിയ, പീറ്റര്‍, ജെന്നിഫര്‍, ഡേവിഡ്, അലന, ജൂലി, ക്ലെം, ദീപ, റോഡ് തുടങ്ങിയവരും ചിത്രത്തിലുണ്ട്.
ആദം കെ അന്തോണി, ജെയിംസ് ലെറ്റര്‍, സിദ്ധാർഥന്‍, കാതറിന്‍, സരോജ് എന്നിവർ ചേർന്നാണ് ചിത്രത്തിന്‍റെ ഛായാഗ്രഹണം നിർവഹിക്കുന്നത്. സംഗീതം മൈക്കിള്‍ മാത്സണ്‍. എഡിറ്റിംഗ് നീല്‍ റേഡ് ഔട്ട്.
