മോഹന്‍ലാല്‍-പൃഥ്വിരാജ് സൂപ്പര്‍ഹിറ്റ് ചിത്രം ലൂസിഫറിന്‍റെ തെലുങ്ക് റീമേക്ക് ഗോഡ്ഫാദര്‍ ട്രെയിലര്‍ പുറത്തിറക്കി. സ്റ്റീഫന്‍ നെടുമ്പള്ളിയായി ചിരഞ്ജീവിയാണ് തെലുങ്കിലെത്തുന്നത്. ആക്ഷന്‍ മാസ് രംഗങ്ങള്‍ ഉള്‍പ്പെടെ ഏകദേശം മലയാളത്തിനോട് സമാനമായ രീതിയിലാണ് തെലുങ്ക് പതിപ്പും ഒരുക്കിയിരിക്കുന്നത്.
വിവേക് ഒബ്‌റോയ് അവതരിപ്പിച്ച ബോബി എന്ന കഥാപാത്രം തെലുങ്കില്‍ ഇല്ല എന്നതാണ് വ്യത്യാസങ്ങളിലൊന്ന്. വില്ലനായി സത്യദേവ് കഞ്ചരണയാണ് എത്തുന്നത്.
തമിഴിലെ പ്രശസ്ത സംവിധായകന്‍ മോഹന്‍രാജ(ജയം രാജ)യാണ് തെലുങ്കില്‍ ലൂസിഫര്‍ ഒരുക്കുന്നത്. മഞ്ജു വാരിയര്‍ അവതരിപ്പിച്ച പ്രിയദര്‍ശിനി എന്ന കഥാപാത്രത്തെ നയന്‍താരയാണ് തെലുങ്കില്‍ അവതരിപ്പിക്കുന്നത്. പൃഥ്വിരാജ് അവതരിപ്പിച്ച സയീദ് മസൂദ് എന്ന ഗ്യാങ്സ്റ്റര്‍ കഥാപാത്രത്തിന്‍റെ റോളില്‍ സല്‍മാന്‍ ഖാന്‍ എത്തുന്നു.
ജോണ്‍ വിജയ്‌യുടെ മയില്‍വാഹനം എന്ന പൊലീസ് കഥാപാത്രത്തെ സമുദ്രക്കനി അവതരിപ്പിക്കും. പുരി ജഗന്നാഥ്, നാസര്‍, ഹരീഷ് ഉത്തമന്‍, സച്ചിന്‍ ഖഡേക്കര്‍ എന്നിവരാണ് മറ്റ് പ്രധാന താരങ്ങള്‍.
ചിത്രത്തിന് സംഗീതമൊരുക്കുന്നത് എസ്.തമനാണ്. ഛായാഗ്രഹണം നിരവ് ഷാ. എഡിറ്റിംഗ് ശ്രീകര്‍ പ്രസാദ്. കൊനിഡേല പ്രൊഡക്ഷന് കമ്പനിയും മെഗാ സൂപ്പര്‍ ഗുഡ് ഫിലിംസും ചേര്‍ന്നാണ് ചിത്രം നിര്‍മിക്കുന്നത്. കേരളത്തില്‍ മാജിക് ഫ്രെയിംസാണ് ചിത്രം വിതരണത്തിനെത്തിക്കുന്നത്.
