കോട്ടയം കിടങ്ങൂർ മാറിയിടം സ്വദേശികളായ കലാസ്നേഹികളുടെ കൂട്ടായ്മയിൽ "സ്നേഹാമൃതം' എന്ന ഭക്തിഗാന ഓഡിയോ സിഡി പുറത്തിറങ്ങി. മാറിയിടം തിരുഹൃദയ ദേവാലത്തിയത്തിൽ നടന്ന ചടങ്ങിൽ കടുത്തുരുത്തി എംഎൽഎ മോൻസ് ജോസഫ് പ്രകാശനം കർമം നിർവഹിച്ചു.
പ്രമുഖ വ്യവസായിയും വേൾഡ് മലയാളി കൗൺസിൽ ഗ്ലോബൽ ചെയർമാനുമായ ജോണി കുരുവിളയാണ് നിർമാണം. ഗാനങ്ങൾ ആലപിച്ചിരിക്കുന്നത് കുവൈറ്റിലെ പ്രവാസിയായ കൊച്ചറയ്ക്കൽ സജി സെബാസ്റ്റ്യനാണ്. ജെയ്മോൻ മാത്യു കുഴിക്കാട്ട് സംഗീതവും ജിജോയി ജോർജ് എരപ്പുങ്കര രചനയും നിർവഹിച്ചു.
മാറിയിടം വികാരി ഫാ: ജോമി പതീപ്പറമ്പിൽ, വേൾഡ് മലയാളി കൗൺസിൽ അംഗവും മനുഷ്യാവകാശ-പരിസ്ഥിതി പ്രവർത്തകനുമായ അഡ്വ: ശിവൻ മഠത്തിൽ, വേൾഡ് മലയാളി കൗൺസിൽ പാലാ ചാപ്റ്റർ പ്രസിഡന്റ് അബ്ദുള്ള ഖാൻ, വേൾഡ് മലയാളി കൗൺസിൽ അംഗം മോനിച്ചൻ, കിടങ്ങൂർ പഞ്ചായത്ത് പ്രസിഡന്റ് ബോബി മാത്യു, കടപ്ലാമറ്റം പഞ്ചായത്ത് പ്രസിഡന്റ് ജോയി കല്ലുപുര, ജോർജുകുട്ടി ഈഴപ്പേരൂർ, പഞ്ചായത്ത് അംഗങ്ങളായ ലൈസമ്മ ജോർജ് ഈഴപ്പേരൂർ, സച്ചിൻ എന്നിവർ ചടങ്ങിൽ പങ്കെടുത്തു.
പ്രശസ്ത പ്രോഗ്രാമർ ശശികുമാർ ചാക്യാട്ട് ആണ് ഗാനത്തിന്റെ ഓർക്കസ്ട്രേഷനും മിക്സിംഗും നിർവഹിച്ചത്. സുനീഷ് പ്രഭാകർ സംവിധാനം ചെയ്യുന്ന ഗാനത്തിന്റെ വീഡിയോ ഉടൻ പുറത്തിറങ്ങും.