ശരത് അപ്പാനി നായകനായി എത്തുന്ന "ആദിവാസി" എന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തിറക്കി വാവാ സുരേഷ്. വിജീഷ് മണി കഥയും തിരക്കഥയും സംഭാഷണവുമെഴുതി സംവിധാനം ചെയ്യുന്ന ചിത്രമാണ് 'ആദിവാസി'. അട്ടപ്പാടിയിൽ ഭക്ഷണം മോഷ്ടിച്ചുവെന്നാരോപിച്ച് തല്ലിക്കൊന്ന മധുവിന്റെ കഥയാണ് 'ആദിവാസി' എന്ന പേരിൽ സിനിമയാക്കുന്നത്.
2018 ഫെബ്രുവരി 22നാണ് സമൂഹ മനസാക്ഷിയെ ഞെട്ടിപ്പിച്ച ക്രൂരമായ കൊലപാതകം നടന്നത്. മാനസിക അസ്വാസ്ഥ്യമുള്ള ആദിവാസി യുവാവ് മധുവാണ് ആൾക്കൂട്ട കൊലപാതകത്തിന് ഇരയായത്. മോഷണക്കുറ്റം ആരോപിച്ചായിരുന്നു കൈകൾ കെട്ടിയിട്ട് മധുവിനെ ആൾക്കൂട്ടം ക്രൂരമായി മർദ്ദിച്ചത്. ഇയാളെ മർദ്ദിക്കുന്നതിന്റെ ദൃശ്യങ്ങൾ സമൂഹമാധ്യമങ്ങളിലൂടെ പ്രചരിച്ചതോടെ വൻ പ്രതിഷേധമാണുയർന്നത്.
വാവാ സുരേഷിന്റെ പോസ്റ്റിന്റെ പൂർണരൂപം
നമുക്ക് ഏറെ വേദനയുള്ള മധുവിന്റെ ജീവിതം പ്രമേയമാകുന്നു സിനിമ "ആദിവാസി" ( ദി ബ്ലാക്ക് ഡെത്ത് ) എന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ ഏറെ സന്തോഷത്തോടെ ഞാൻ പ്രകാശനം ചെയ്യുന്നു. കവിയും ഹോളിവുഡ് സംവിധായകനുമായ ഡോ. സോഹൻ റോയ് നിർമ്മിച്ച് ശരത് അപ്പാനി പ്രധാന വേഷത്തിൽ അഭിനയിച്ച സിനിമയുടെ കഥയും സംവിധാനവും വിജീഷ് മണിയാണ്.
പോസ്റ്റർ റിലീസ് ചടങ്ങിൽ സംവിധായകൻ വിജീഷ് മണി, കെപിഎസി ലീലാകൃഷ്ണൻ, അരുൺ.കരവാളൂർ (ഏരീസ് ഗ്രൂപ്പ്), സുരേഷ് സൂര്യശ്രീ, മാസ്റ്റർ റംസാൻ എന്നിവർ പങ്കെടുത്തു.
" ആദിവാസി " എന്ന സിനിമയ്ക്ക് എല്ലാവിധ വിജയാശംസകൾ നേരുന്നു...