തമിഴകത്തെ ശ്രദ്ധേയ ഹിറ്റ് ഗാനങ്ങൾക്ക് വരികൾ എഴുതിയ വിവേകയും അരുൺ ഭാരതിയും മലയാളത്തിലേക്കും. നവാഗതനായ മനോജ് കെ. വർഗീസ് രചനയും സംവിധാനവും നിർവഹിക്കുന്ന "ഫ്രീസർ നമ്പർ 18' എന്ന ചിത്രത്തിലെ രണ്ട് തമിഴ് ഗാനങ്ങൾക്ക് ഇരുവരും വരികൾ എഴുതും.
1999-ൽ തമിഴിൽ ഗാനരചയിതാവായി തുടക്കം കുറിച്ച വിവേക അണ്ണാത്തെ അണ്ണാത്തെ, എക്സ്ക്യൂസ്മീ മിസ്റ്റർ കന്തസാമി, എൻ പേരു മീനാകുമാരി, ഡാഡി മമ്മി വീട്ടിലില്ല തുടങ്ങി നിരവധി ഹിറ്റ് ഗാനങ്ങളടക്കം 2,500 ഓളം തമിഴ് ഗാനങ്ങൾക്ക് വരികൾ എഴുതിയിട്ടുണ്ട്.
വാ സാമി, നാഗ നാഗ, മീശവച്ച വേട്ടക്കാരൻ തുടങ്ങി നിരവധി പവർപാക്ഡ് ഗാനങ്ങളിലൂടെ തമിഴ് സിനിമാലോകത്ത് സ്ഥാനം ഉറപ്പിച്ച ഗാനരചയിതാവാണ് അരുൺ ഭാരതി. കേരള സിലബസിലെ പ്ലസ് വൺ വിദ്യാർഥികൾക്ക് അരുൺ ഭാരതിയുടെ "ഈമ കലയം' എന്ന കവിത പാഠ്യവിഷയമാണ്.
"ഫ്രീസർ നമ്പർ 18' എന്ന ചിത്രത്തിലെ വിവേക എഴുതിയ ഗാനത്തിന് ശബ്ദം നൽകുന്നത് ശങ്കർ മഹാദേവനും സിത്താര കൃഷ്ണകുമാറുമാണ്. അരുൺ ഭാരതി എഴുതുന്ന ഗാനം ഹരിഛരണും എംവി മഹാലിംഗവും ജ്യോത്സനയും ചേർന്നാണ് ആലപിക്കുന്നത്. സി.പി.ഷഫ്റീൻ നിർമിക്കുന്ന ചിത്രത്തിന്റെ ഷൂട്ടിംഗ് മാർച്ചിൽ തുടങ്ങും.