ആക്ഷൻ ഹീറോ വിശാലും ആര്യയും ഒന്നിക്കുന്ന മാസ് ആക്ഷൻ ത്രില്ലർ ചിത്രമായ എനിമി ദീപാവലിക്ക് ലോകമെമ്പാടും തിയറ്ററുകളിൽ പ്രദർശനത്തിനെത്തുന്നു.
ഇരുമുഖൻ, അരിമാ നമ്പി എന്നീ ഹിറ്റ് ചിത്രങ്ങൾ അണിയിച്ചൊരുക്കിയ ആനന്ദ് ശങ്കറാണ് എനിമിയുടെ രചയിതാവും സംവിധായകനും. ജനപ്രീതി നേടിയ അവൻ ഇവൻ എന്ന സിനിമക്ക് ശേഷം വിശാലും ആര്യയും ഒന്നിക്കുന്നു എന്ന സവിശേഷതയും ചിത്രത്തിനുണ്ട്.പ്രതിനായക കഥാപാത്രമാണ് ആര്യയുടേത് എന്നാണ് സൂചന.
മൃണാളിനി രവിയും മംമ്ത മോഹൻദാസുമാണ് നായികമാർ. പ്രകാശ് രാജ് കേന്ദ്ര കഥാപാത്രത്തെ അവതരിപ്പിക്കുന്നു. തമ്പി രാമയ്യ, കരുണാകരൻ, മാളവികാ അവിനാഷ് എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത് .
ആർ.ഡി.രാജ ശേഖറാണ് ഛായാഗ്രാഹകൻ. ഗാനങ്ങൾക്ക് എസ്. തമൻ സംഗീതം പകർന്നിരിക്കുന്നു. സാം സി. എസ്. പശ്ചാത്തല സംഗീതവും നൽകിയിരിക്കുന്നു. മിനി സ്റ്റുഡിയോയാണ് ഈ ബിഗ് ബജറ്റ് ചിത്രത്തിന്റെ നിർമാതാക്കൾ.