മലയാളത്തിലെ എക്കാലത്തെയും മികച്ച അഭിനേത്രികളിൽ ഒരാളാണ് ശോഭന. നടി എന്നതിലുപരി ഒരു മികച്ച നർത്തകി കൂടിയായ ശോഭന ഇപ്പോഴും നൃത്തവേദികളിൽ സജീവമാണ്.
ഇപ്പോഴിതാ പുതിയ കാലഘട്ടത്തിനനുസരിച്ച് തന്‍റെ നൃത്തശൈലി മാറ്റേണ്ടിവന്നുവെന്ന് പറയുകയാണ് ശോഭന. ഓരോരുത്തരും നൃത്തത്തെ കാണുന്ന രീതി വ്യത്യസ്തമായിരിക്കുമെന്നും അവരുടെ അറിവും പഠനവും വച്ച് അതു മാറിക്കൊണ്ടേയിരിക്കുമെന്നും അതുപോലെ തന്നെയാണ് തന്‍റെ കാര്യവുമെന്നും താരം പറയുന്നു.
പണ്ടൊക്കെ പതുക്കെയാണ് മാറ്റങ്ങളുണ്ടായിരുന്നത്. എന്നാല്‍ സോഷ്യല്‍ മീഡിയ, പ്രത്യേകിച്ച് ഇന്‍സ്റ്റഗ്രാം വന്നശേഷം ആ മാറ്റത്തിന്‍റെ വേഗം കൂടിയെന്നും ശോഭന പറയുന്നു.
"സ്റ്റേജില്‍ നൃത്തം ചെയ്ത് പരീശിലിച്ചയാളാണ് ഞാന്‍. കൈകളൊക്കെ പൂര്‍ണമായും വിടര്‍ത്തിയാണ് സ്റ്റേജില്‍ നൃത്തം ചെയ്യുന്നത്. എന്നാല്‍, ഇന്‍സ്റ്റഗ്രാമിനു വേണ്ടി നൃത്തം ചെയ്യുമ്പോള്‍ അതൊക്കെ മാറ്റേണ്ടി വരുന്നു. ഒരേ സ്ഥലത്തു നിന്ന് നൃത്തം ചെയ്യണം, കൈകള്‍ അധികം വിടര്‍ത്താനും പറ്റില്ല. അക്കാര്യത്തിലൊക്കെ സങ്കടമുണ്ട്. ഒരു പോസിറ്റീവ് വശമെന്താണെന്നു വെച്ചാല്‍ നൃത്തത്തെ കുറിച്ചുള്ള അറിവുകള്‍ മറ്റുള്ളവര്‍ക്ക് പകര്‍ന്നു കൊടുക്കാന്‍ കഴിയും. പ്രത്യേകിച്ച് ഈ കോവിഡ് കാലത്ത്.' -ശോഭന പറഞ്ഞു.
