തെലുങ്ക് താരം ഗോപിചന്ദും തെന്നിന്ത്യൻ താരം റഹ്മാനും ഒന്നിച്ച തെലുങ്ക് സിനിമ സീട്ടിമാർ സെപ്റ്റംബർ മൂന്നിന് തിയറ്ററുകളിൽ എത്തുന്നു. ലോക്ക്ഡൗണിന് ശേഷം തിയറ്ററിൽ പ്രദർശനത്തിനെത്തുന്ന ആദ്യത്തെ തെലുങ്ക് ബിഗ് ബജറ്റ് ചിത്രമാണിത്.
വരുൺസന്ദേശ് നായകനായ ഏ മണ്ടി ഏ വേല, രാം ചരണിന്റെ രച , രവി തേജയുടെ ബംഗാൾ ടൈഗർ , ഗോപി ചന്ദിന്റെ തന്നെ ഗൗതം നന്ദ തുടങ്ങിയ വൻ വിജയ ചിത്രങ്ങൾ അണിയിച്ചൊരുക്കിയുവ സംവിധായകൻ സമ്പത്ത് നന്തിയാണ് സീട്ടിമാറിന്റെ രചയിതാവും സംവിധായകനും.
കബഡി കളിയുടെ പശ്ചാത്തലത്തിലുള്ള ഒരു ആക്ഷൻ എന്റർടെയ്നറാണ് ചിത്രം. സീട്ടിമാറിലെ കേന്ദ്ര കഥാപാത്രമായ അരവിന്ദ് എന്ന പോലീസ് കമ്മീഷണർ കഥാപാത്രത്തെയാണ് റഹ്മാൻ അവതരിപ്പിക്കുന്നത്.
ഭൂമിക ചൗളയാണ് റഹ്മാന്റെ ജോഡി. തമന്നയാണ് ഗോപി ചന്ദിന്റെ ജോഡി. മണി ശർമയാണ് സംഗീത സംവിധായകൻ. ലോക്ക്ഡൗണിന് ശേഷം തിയറ്ററിൽ എത്തുന്ന ആദ്യത്തെ ബ്രഹ്മാണ്ഡ ചിത്രമായത് കൊണ്ട് സീട്ടിമാർ ടോളിവുഡിൽ പുത്തൻ ഉണർവ് നൽകുമെന്ന പ്രതീക്ഷയിലാണ് തെലുങ്ക് സിനിമാലോകം.