തെലുങ്ക് സിനിമാതാരങ്ങളായ റാണാ ദഗുപതി, രവി തേജ, രാകുല് പ്രീത് സിംഗ് എന്നിവരുപ്പടെ 12 പേരെ മയക്കുമരുന്നു കേസിൽ ചോദ്യം ചെയ്യാനൊരുങ്ങി എൻഫോഴ്സ്മെന്‍റ് ഡയറക്ടറേറ്റ്.
നാലുവർഷം പഴക്കമുള്ള മയക്കുമരുന്ന് കേസുമായി ബന്ധപ്പെട്ടാണ് ഇവരെ ചോദ്യം ചെയ്യുന്നത്. രാകുലിനോട് സെപ്റ്റംബർ ആറിനും റാണയോട് സെപ്റ്റംബർ എട്ടിനും രവി തേജയോട് സെപ്റ്റംബർ ഒന്പതിനും ഹാജരാകാനാണ് ഇഡി ആവശ്യപ്പെട്ടിരിക്കുന്നത്.
സംവിധായകൻ പുരി ജഗന്നാഥ് സെപ്റ്റംബർ 31-നാണ് ഹാജരാകേണ്ടത്. 30 ലക്ഷം വിലവരുന്ന മയക്കുമരുന്ന് 2017-ലാണ് തെലുങ്കാന എക്സൈസ് പിടിച്ചെടുത്തത്. ഇതിനു പിന്നാലെ 12 കേസുകളും രജിസ്റ്റർ ചെയ്തിരുന്നു. 11 കേസുകളിൽ കുറ്റപത്രം സമർപ്പിച്ചിട്ടുണ്ട്. എക്സൈസ് രജിസ്റ്റർ ചെയ്ത കേസുകളുടെ അടിസ്ഥാനത്തിലാണ് കള്ളപ്പണം വെളുപ്പിക്കൽ നടന്നോയെന്ന അന്വേഷണം ഇഡി ആരംഭിച്ചത്.
അതേസമയം രാകുൽ പ്രീത് സിംഗ്, റാണാ, രവി തേജ, പുരി ജഗന്നാഥ് എന്നിവരെ ഇതുവരെ പ്രതിചേർത്തിട്ടില്ല. ഇവർ കള്ളപ്പണം വെളുപ്പിക്കലിൽ പങ്കാളികളായിട്ടുണ്ടോയെന്ന് ഇപ്പോൾ പറയാനാകില്ലെന്ന് ഇഡി ഉദ്യോഗസ്ഥൻ പറഞ്ഞു. മയക്കുമരുന്നു കേസുമായി ബന്ധപ്പെട്ട് തെലുങ്കാന എക്സൈസ് ഇതുവരെ 30 പേരെ അറസ്റ്റ് ചെയ്യുകയും 62 പേരെ ചോദ്യം ചെയ്യുകയും ചെയ്തിട്ടുണ്ട്. ഇതിൽ 12 പേർ സിനിമാ മേഖലയുമായി ബന്ധമുള്ളവരാണ്.
