ദൃശ്യം 2ന്റെ സെറ്റിലെ മോഹൻലാലിന്റെ തമാശകളെക്കുറിച്ച് കുറിച്ച് എസ്തർ. "സെറ്റിൽ എന്നെ ഏറ്റവും കൂടുതൽ ശല്യപ്പെടുത്തിയിരുന്ന ആൾ, പക്ഷേ എന്നും എനിക്ക് ഏറ്റവും പ്രിയപ്പെട്ട ആളും. ദൃശ്യം 2ന്റെ ചിത്രീകരണം ആരംഭിച്ചപ്പോൾ ചെയ്തു തീർക്കാനുള്ള അസൈൻമെന്റുകളെ കുറിച്ചും എഴുതാനിരിക്കുന്ന പരീക്ഷകളെ കുറിച്ചുമൊക്കെ ആലോചിച്ച് വിഷമിച്ചും ആശങ്കപ്പെട്ടുമാണ് ഞാൻ എന്നും സെറ്റിലെത്തിയിരുന്നത്.
എന്നാൽ മനോഹരമായൊരു പുഞ്ചിരിയോടെ ശുഭദിനം നേർന്നുകൊണ്ട് ഈ മനുഷ്യൻ അടുത്തുവരും. ഒരിക്കൽ മാത്രമല്ല, എല്ലാ ദിവസവും. എന്റെ ദിവസത്തെ പ്രകാശപൂരിതമാക്കാൻ അത് ധാരാളമായിരുന്നു. എന്ത് സംഭവിച്ചാലും എന്നെ കളിയാക്കാൻ എന്തെങ്കിലും ഒരു കാരണം അദ്ദേഹം കണ്ടെത്തും, മീനചേച്ചിയും അൻസിബ ചേച്ചിയും അദ്ദേഹത്തിന്റെ ടീമിൽ ചേരും.
എന്തുകൊണ്ടായിരുന്നു എന്നെ മാത്രം ലക്ഷ്യമിട്ടിരുന്നതെന്നാണ് ചിന്തിക്കുന്നത്. ദൃശ്യം 2ന്റെ ചിത്രീകരണ സമയം ഞങ്ങൾക്കൊക്കെ ഏറ്റവും മനോഹരങ്ങളായ ദിവസങ്ങളായിരുന്നു. കൂടെ പ്രവർത്തിക്കാൻ ഏറ്റവും മികച്ച, സന്തോഷവാനും രസികനുമായ ഒരാളായതിൽ കുന്നോളം നന്ദി ലാലങ്കിൾ. ഒത്തിരി സ്നേഹം,” മോഹൻലാലിനൊപ്പമുള്ള ചിത്രം പങ്കുവച്ച് എസ്തർ കുറിച്ചു.
ദൃശ്യത്തിൽ ഏറ്റവും ശ്രദ്ധ നേടിയ വേഷങ്ങളിൽ ഒന്നായിരുന്നു എസ്തർ അനിൽ അവതരിപ്പിച്ച മോഹൻലാൽ അവതരിപ്പിച്ച ജോർജുകുട്ടിയുടെ മകളുടെ വേഷമായ അനുമോളെന്ന കഥാപാത്രം.