കമ്മാരസംഭവത്തിനു ശേഷം രതീഷ് അമ്പാട്ടും മുരളി ഗോപിയും ഒത്തുചേരുന്ന പുതിയ ചിത്രമായ തീർപ്പ് കൊച്ചിയിൽ ആരംഭിച്ചു. പൃഥ്വിരാജാണ് ചിത്രത്തിൽ നായകൻ.
ഫ്രൈഡേ ഫിലിംഹൗസിന്റെ ബാനറിൽ വിജയ് ബാബുവും മുരളി ഗോപിയും രതീഷ് അമ്പാട്ടും ചേർന്നുള്ള സെല്ലുലോയ്ഡ് മാർഗ് നിർമ്മിക്കുന്ന ഈ ചിത്രത്തിന്റെ ചിത്രീകരണം കൊച്ചി കടവന്ത്രയിലെ കവലയ്ക്കൽ ഭഗവതി ക്ഷേത്രത്തിലെ ചടങ്ങുകളോടായാണ് ആരംഭിച്ചത്.
വൻവിജയം നേടിയ ലൂസിഫറിനു ശേഷം മുരളി ഗോപി തിരക്കഥ രചിക്കുന്ന ചിത്രം കൂടിയാണ് തീർപ്പ്. പൃഥ്വിക്കൊപ്പം ഇന്ദ്രജിത്ത്, സൈജു കുറുപ്പ്, വിജയ് ബാബു, സിദ്ദിഖ്, മാമുക്കോയ, ശ്രീകാന്ത് മുരളി, ഷാജുശ്രീധർ, സുനിൽ നെല്ലായ്, ഇഷ തൽവർ, ഹന്ന റെജി കോശി, ശ്രീലക്ഷ്മി എന്നിവരും പ്രധാന വേഷങ്ങളെ അവതരിപ്പിക്കുന്നു.