തിയറ്റർ നാടകങ്ങളിലൂടെ ഒട്ടനവധി പുരസ്കാരങ്ങൾക്ക് അർഹനായ സുരേന്ദ്രൻ കല്ലൂർ രചനയും സംവിധാനവും നിർവഹിച്ച മുന്ന എന്ന സിനിമയുടെ പോസ്റ്റർ സിനിമാ താരം സുരാജ് വെഞ്ഞാറമ്മൂട് പുറത്തിറക്കി.
ഇന്നത്തെ കാലഘട്ടങ്ങളിൽ നമുക്ക് നഷ്ടമായ സൗഹൃദങ്ങളുടെ കഥ ഒരു ഗ്രാമത്തിന്റെ പശ്ചാത്തലത്തിൽ പറയുന്ന ചിത്രത്തിൽ പുതുമുഖതാരം കിരൺകൃഷ്ണ ടൈറ്റിൽ കഥാപാത്രമായ മുന്നയെ അവതരിപ്പിക്കുന്നു. മിൽന ആന്റണിയാണ് നായിക. ചിത്രത്തിൽ ഉപ്പൂപ്പ എന്ന അതിശക്തമായ വേഷം കൈകാര്യം ചെയ്തിരിക്കുന്നത് ജഗദീഷ് ആണ്.
ഇവരെക്കൂടാതെ ഇന്ദ്രൻസ്, ഹരീഷ് പേരടി, കിച്ചു ടെല്ലസ്, മാമുക്കോയ, തട്ടീം മുട്ടീം ഫെയിം ജയകുമാർ, അൻസിൽ റഹ്മാൻ തുടങ്ങിയ മുൻനിര താരങ്ങൾക്കൊപ്പം കണ്ണൂരിലെ സ്വന്തം കോമഡി താരങ്ങളും അമ്പതോളം പുതുമുഖങ്ങളും അണിനിരക്കുന്നു.
ചന്ദ്രോത്ത് വീട്ടിൽ ഫിലിംസിന്റെ ബാനറിൽ ദേവൻ ആണ് മുന്ന നിർമിക്കുന്നത്. രമേശ് പുല്ലാപ്പള്ളി, ജയശ്രീ ഗോപിനാഥ് എന്നിവരുടെ വരികൾക്ക് സിബു സുകുമാരൻ ഈണംപകരുന്നു. പ്രശാന്ത്പ്രണവം ആണ് ഛായാഗ്രഹണം നിർവഹിച്ചിരിക്കുന്നത്.