ഷക്കീലയുടെ ജീവിതം ആസ്പദമാക്കി ഇന്ദ്രജിത് ലങ്കേഷ് സംവിധാനം ചെയ്യുന്ന ഷക്കീല-നോട്ട് എ പോൺസ്റ്റാർ എന്ന ചിത്രത്തിന്റെ ടീസർ റിലീസ് ചെയ്തു. റിച്ച ഛദ്ദയാണ് ചിത്രത്തിൽ ഷക്കീലയുടെ വേഷം അവതരിപ്പിക്കുന്നത്. ക്രിസ്മസിനാണ് ചിത്രം തിയറ്ററുകളിൽ എത്തുക.
ഷൂട്ടിംഗ് തുടങ്ങുന്നതിനു മുൻപു തന്നെ ഷക്കീലയെന്ന വ്യക്തിയെ അടുത്തറിയാനായി റിച്ച ബംഗളൂരുവിൽവച്ച് ഷക്കീലയുമായി കൂടിക്കാഴ്ച നടത്തിയിരുന്നു. ഇപ്പോഴിത സിനിമയുടെ ടീസർ കണ്ടതിന് ശേഷമുള്ള ഷക്കീലയുടെ വാക്കുകളാണ് വൈറലാകുന്നത്. എന്റെ ബയോപിക് ചിത്രത്തിന്റെ ട്രെയ്ലർ കണ്ട ഞാൻ ശരിക്കും സന്തോഷവതിയാണെന്നാണ് ഷക്കീല പറയുന്നത്.
"എന്റെ ബയോപിക് ചിത്രത്തിന്റെ ട്രെയ്ലർ കണ്ട ഞാൻ ശരിക്കും സന്തോഷവതിയാണ്. ചിത്രത്തിൽ റിച്ച ഛദ്ദ അതിശയകരമായിരിക്കുമെന്ന് ഞാൻ കരുതുന്നു. എന്റെ കഥാപാത്രത്തോട് അവർ പൂർണമായും നീതി പുലർത്തിയിട്ടുണ്ട്. കൂടാതെ എന്റെ കഥ സിനിമയാക്കുവാൻ ലങ്കേഷ് കാണിച്ച ധൈര്യത്തെയും എന്നോട് കാണിച്ച പരിഗണനയ്ക്കും നന്ദി'.
"എന്റെ പഴയകാലത്തെ പല കാര്യങ്ങളും ടീസർ ഓർമപ്പെടുത്തി. പ്രത്യേകിച്ച് എന്റെ മുൻ കാമുകൻ റിച്ചാർഡ്. രാജീവ് അദ്ദേഹത്തെ പോലെയാണ്. ട്രെയ്ലർ കണ്ടതിന് ശേഷം എനിക്ക് അങ്ങനെ തോന്നിയെങ്കിൽ മുഴുവൻ സിനിമയും കണ്ടതിന് ശേഷം എനിക്ക് എങ്ങനെ തോന്നും എന്ന് സങ്കൽപ്പിക്കുക'. ഷക്കീല പറഞ്ഞു.