മലയാളത്തിൽ താൻ ഒരിക്കലും കാണാൻ ആഗ്രഹിക്കാത്ത സിനിമയാണ് തുലാഭാരം എന്നു മലയാളത്തിന്‍റെ പ്രിയനടി ഷീല ഒരിക്കൽ വെളിപ്പെടുത്തി. ആ സിനിമയിൽ തന്നോട് പറഞ്ഞിരുന്ന വേഷമല്ല തനിക്ക് ലഭിച്ചതെന്നും ഷീല വ്യക്തമാക്കി.
താൻ ആ റോൾ ചെയ്തില്ലെങ്കിൽ പണം മുടക്കുന്ന നിർമാതാവിന് അത് വലിയ ബാധ്യതയായി മാറും എന്ന് പറഞ്ഞതു കൊണ്ടാണ് തന്ന വേഷം സ്വീകരിച്ചതെന്നും ഷീല തുറന്നു പറഞ്ഞിരുന്നു. തന്‍റെ കഥാപാത്രത്തെ ഒരു രണ്ടാം നിരയിലേക്ക് മാറ്റുന്പോൾ താൻ എന്തിനു ആ സിനിമ കാണണമെന്ന് ഷീല ചോദിക്കുന്നു.
സെറ്റിലെത്തി മേക്കപ്പ് ചെയ്തപ്പോഴാണ് തനിക്ക് എല്ലാം മനസിലായതെന്നും ഷീല പറയുന്നു. തുലാഭാരം എന്ന ചിത്രത്തിലെ വിജയ എന്ന നായിക കഥാപാത്രത്തെ അവതരിപ്പിച്ചത് ശാരദയായിരുന്നു. വത്സല എന്ന രണ്ടാം നായികയുടെ റോളിലാണ് ഷീല ചിത്രത്തിൽ അഭിനയിച്ചത്.
സിനിമ ചെയ്യുന്ന സമയത്ത് മലയാള സിനിമകളോടായിരുന്നു തനിക്ക് പ്രിയമെന്നും തമിഴ് സിനിമയിൽ അഭിനയിക്കാൻ പോകുന്പോൾ തീരെ കംഫർട്ട് അല്ലായിരുന്നുവെന്നും ഷീല പറയുന്നു. മലയാളത്തിൽ ഗ്ലാമറസ് ആയി കഥാപാത്രത്തെ ചെയ്യുന്പോഴും അതിലെല്ലാം തന്നെ നല്ലൊരു കഥയും നല്ലൊരു കഥാപാത്രവും ഉണ്ടായിരുന്നതായി ഷീല പറയുന്നു.
പക്ഷെ തമിഴിൽ അവർക്ക് ഗ്ലാമർ എന്ന ഒരു കാര്യം മാത്രം മതിയായിരുന്നുവെന്നും അത് കൊണ്ടുതന്നെ തന്‍റെ അമ്മ തമിഴ് സിനിമ ചെയ്യുന്നതിന് എതിരായിരുന്നുവെന്നും ഒരു ടെലിവിഷൻ ചാനലിനു അനുവദിച്ച അഭിമുഖത്തിൽ ഷീല പറഞ്ഞു.
