സമൂഹമാധ്യമങ്ങളിൽ ഇക്കഴിഞ്ഞ ദിവസം ഏതാനും ചിത്രങ്ങളും വീഡിയോയും വൈറലായി. ആരാധകർ ഇരുകൈയും നീട്ടിയാണ് ഇതു സ്വീകരിച്ചത്.
സാൾട്ട് ആൻഡ് പെപ്പർ ലുക്കിൽ മമ്മൂക്ക
ഞായറാഴ്ച സാമൂഹിക മാധ്യമങ്ങളിൽ പടർന്നുകയറിയ ചിത്രമേത് എന്ന് ചോദിച്ചാൽ ഒറ്റ ഉത്തരമേ ഉണ്ടാവൂ. മലയാളികളുടെ സ്വന്തം മമ്മൂക്കയുടെ. തന്റെ ഇൻസ്റ്റാഗ്രാം പേജിൽ താരമിട്ട രണ്ട് ചിത്രങ്ങൾ ചർച്ചയാവാൻ അധികസമയമൊന്നും വേണ്ടിവന്നില്ല. താടി വെച്ച് സാൾട്ട് ആൻഡ് പെപ്പർ ലുക്കിലാണ് മമ്മൂട്ടി. വർക്ക് അറ്റ് ഹോമെന്നാൽ വർക്ക്ഔട്ട് എന്ന അടിക്കുറിപ്പോടെയാണ് ചിത്രം പോസ്റ്റ് ചെയ്തിരിക്കുന്നത്.
ആരാധകർക്കൊപ്പം തന്നെ യുവ ചലച്ചിത്ര താരങ്ങളും മെഗാസ്റ്റാറിന്റെ പോസ്റ്റിന് കമന്റുകളുമായെത്തി. ഇനീപ്പോ നമ്മൾ നിൽക്കണോ പോകണോ എന്നായിരുന്നു ഷറഫുദ്ദീന്റെ കമന്റ്. ചുള്ളൻ മമ്മൂക്ക എന്നായിരുന്നു ഉണ്ണി മുകുന്ദന്റെ പ്രതികരണം.കോവിഡ് കാലത്തിന് ശേഷം സിനിമയിൽ അരങ്ങേറ്റം കുറിക്കാൻ പോകുന്ന യുവതാരത്തിന്റെ സെൽഫിയാണിതെന്നാണ് ചിത്രം പോസ്റ്റ് ചെയ്തുകൊണ്ട് അനൂപ് മേനോൻ ഫേസ്ബുക്കിൽ കുറിച്ചത്.ആസിഫ് അലി, ടൊവിനോ തോമസ്, രജിഷ വിജയൻ, അനു സിതാര തുടങ്ങിയവരും താരത്തിനു കൈയടികളുമായെത്തി.
വീട്ടിലെ വെള്ളരിപ്രാവ്
സൂഫിയും സുജാതയും എന്ന ചിത്രത്തിലെ വാതിക്കല് വെള്ളരിപ്രാവ് എന്ന ഗാനം മലയാളികളുടെ മനസു തൊട്ട ഗാനമാണ്. ഈ ഗാനത്തിൽ പരീക്ഷണം നടത്തിയവർ നിരവധിയാണ്. ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത് നടൻ ജയസൂര്യയുടെ മകളുടെ ഡാൻസാണ്. ഈ ഗാനത്തിനൊപ്പം മനോഹരമായി ചുവടു വയ്ക്കുകയാണ് വേദ.
ജയസൂര്യ തന്നെയാണ് മകളുടെ ഡാൻസ് വീഡിയോ സോഷ്യൽ മീഡിയയിലൂടെ പങ്കുവച്ചത്. വീട്ടിലെ വെള്ളരിപ്രാവ് എന്ന അടിക്കുറിപ്പിലാണ് വിഡിയോ. ലോംഗി ഫ്രോക്ക് അണിഞ്ഞ് മനോഹരമായാണ് വേദയുടെ നൃത്തം. സോഷ്യൽ മീഡിയയുടെ മനസു കീഴടക്കുകയാണ് വിഡിയോ. ഇതിനോടകം നിരവധി പേരാണ് വേദയുടെ ഡാൻസിനെ പുകഴ്ത്തിക്കൊണ്ട് രംഗത്തെത്തിയത്.
ജയസൂര്യയും അതിഥി റാവുവും പ്രധാനവേഷത്തിലെത്തിയ സൂഫിയും സുജാതയും എന്ന ചിത്രത്തിലെ ഗാനങ്ങളെല്ലാം ഒന്നിനൊന്ന് മനോഹരങ്ങളാണ്.
ഹോട്ട് ലുക്കിൽ മീര
ഹോട്ട്ലുക്കിൽ പ്രത്യക്ഷപ്പെട്ട മലയാളികളുടെ പ്രിയതാരം മീരാ നന്ദന്റെ കവർ സോംഗ് ആണ് വൈറലായ മറ്റൊരു വീഡിയോ. ഗ്ലാമറസ് കോസ്റ്റ്യൂമിൽ പ്രശസ്തമായ വസീഗര എന്ന ഗാനമാണ് മീര കവർ രൂപത്തിൽ പുറത്തിറക്കിയിരിക്കുന്നത്.
സറാ സറാ എന്നാണ് വിഡിയോയുടെ പേര്. വീഡിയോയുടെ സംവിധാനവും ഛായാഗ്രഹണവും നിർവഹിച്ചിരിക്കുന്നത് ഫാഷൻ ഫോട്ടോഗ്രാഫർ ഷിനിഹാസ് അബുവാണ്. ദുബായിൽ വച്ചാണ് വീഡിയോ ചിത്രീകരിച്ചിരിക്കുന്നത്. ഗാനത്തിലെ മീരയുടെ ലുക്ക് സൂപ്പറാണെന്നാണ് ആരാധകർ കമന്റ് ചെയ്യുന്നത്.
കൂട്ടുകാർക്കൊപ്പം ചാടിത്തിമിർത്ത് അമല
ലോക്ക്ഡൗണ് കാലത്ത് നിരവധി ചിത്രങ്ങൾ പങ്കുവച്ച് സോഷ്യൽ മീഡിയകളിൽ സജീവമാണ് നടി അമല പോൾ. ഇപ്പോൾ ഇതാ ഏറ്റവും പുതിയതായി കൊച്ചിയിലെ കുഴുപ്പള്ളി ബീച്ചിൽ കൂട്ടുകാർക്ക് ഒപ്പം മണ്ണുവാരിയെറിഞ്ഞും തിരമാലകൾക്കു മേൽ ചാടിത്തിമർത്തും ആഘോഷിക്കുന്ന വീഡിയോ പങ്കുവച്ചിരിക്കുകയാണ് നടി.
ലോക്ഡൗണ് തുടക്കത്തിൽ ഞാൻ ചെയ്ത ആദ്യകാര്യം ഇതായിരുന്നു. സ്വാതന്ത്ര്യത്തിന്റെയും ചലനസ്വാതന്ത്ര്യത്തിന്റെയും വില എത്രത്തോളമാണ് എന്നതായിരുന്നു ഈ സമയത്ത് മനസിലാക്കിയ ഏറ്റവും പ്രധാനപ്പെട്ട ഒരു കാര്യം, എന്റെ സ്വാതന്ത്ര്യം ആണ് എനിക്കെല്ലാം. എന്റെ പ്രിയപ്പെട്ടവരുമായി പ്രകൃതിയിൽ സമയം ചെലവിടുന്നതും എനിക്ക് ഞാനായിത്തന്നെ ഇരിക്കാൻ കഴിയുന്നതിനേക്കാളും സന്തോഷം നൽകുന്ന മറ്റൊന്നില്ല. സ്വാതന്ത്ര്യ ദിനത്തിൽ പങ്കുവച്ച വീഡിയോയ്ക്ക് ഒപ്പമുള്ള കുറിപ്പിൽ അമല കുറിച്ചു.