വിഷ്ണു ഉണ്ണികൃഷ്ണനെ നായകനാക്കി സുജിത് ലാൽ ഒരുക്കുന്ന രണ്ട് എന്ന ചിത്രത്തിന്റെ ഫസ്റ്റ്ലുക്ക് പോസ്റ്റർ പുറത്തിറങ്ങി. മമ്മൂട്ടിയുടെയും മോഹൻലാലിന്റെയും ഔദ്യോഗിക ഫേസ്ബുക്ക് പേജിലൂടെയാണ് പോസ്റ്റർ പുറത്തിറക്കിയത്.
എല്ലാ മനുഷ്യരെയും ഒരുപോലെ കാണാൻ ശ്രമിക്കുന്ന വാവ എന്ന ചെറുപ്പക്കാരനായ ഓട്ടോ ഡ്രൈവറുടെ ജീവിതത്തിലൂടെയുള്ളൊരു സഞ്ചാരമാണ് സിനിമ. മാറിവരുന്ന ജാതിമത രാഷ്ട്രീയ പരിസരങ്ങളെയും ഭയങ്ങളെയും ആക്ഷേപഹാസ്യത്തിൽ നോക്കിക്കാണുന്ന സിനിമകൂടിയാണ് രണ്ട്.
വിഷ്ണു ഉണ്ണികൃഷ്ണൻ, അന്നരേഷ്മ രാജൻ, ഇന്ദ്രൻസ്, ടിനിടോം, ഇർഷാദ്, കലാഭവൻ റഹ്മാൻ, സുധികോപ്പ, മാല പാർവതി, അനീഷ് ജി. മേനോൻ, നവാസ് വള്ളിക്കുന്ന്, സ്വരാജ് എന്നിവർ അഭിനയിക്കുന്നു.
ഹെവൻലി മൂവീസിന്റെ ബാനറിൽ പ്രജീവ് സത്യവ്രതൻ ആണ് ചിത്രം നിർമിക്കുന്നത്. കഥയും തിരക്കഥയും സംഭാഷണവും ബിനുലാൽ ഉണ്ണിയുടേതാണ്. റഫീഖ് അഹമ്മദിന്റെ വരികൾക്ക് എം. ജയചന്ദ്രൻ സംഗീതം പകരുന്നു.