ഉണ്ണികൃഷ്ണൻ ആവള തിരക്കഥയെഴുതി സംവിധാനം ചെയ്യുന്ന ഉടലാഴം ഈമാസം ആറിന് തീയറ്ററുകളിലെത്തും. മോഹൻലാലിന്റെ "ഫോട്ടോഗ്രാഫർ' എന്ന ചിത്രത്തിലൂടെ മികച്ച ബാലതാരത്തിനുള്ള സംസ്ഥാന അവാർഡ് നേടിയ മണിയാണ് ചിത്രത്തിൽ നായകനാകുന്നത്. അനുമോളാണ് നായിക.
ഇവർക്കൊപ്പം രമ്യ വൽസല, ഇന്ദ്രൻസ്, ജോയ് മാത്യു, സജിത മഠത്തിൽ, നിലന്പൂർ ആയിഷ രാജീവൻ, അബു വളയംകുളം, സുനി തുടങ്ങിയവരും അഭിനയിക്കുന്നു. പുതിയ കാലത്ത് ജീവിക്കാൻ വേണ്ടി നെട്ടോട്ടമോടുന്ന ഗുളികൻ എന്ന ആദിവാസി യുവാവിന്റെ കഥയാണ് ഉടലാഴത്തിൽ പറയുന്നത്.
സംവിധായകൻ ആഷിഖ് അബു അവതരിപ്പിക്കുന്ന ഉടലാഴം, ഡോക്ടേഴ്സ് ഡിലമയുടെ ബാനറിൽ ഡോക്ടർ മനോജ് കെ ടി,ഡോക്ടർ രാജേഷ് കുമാർ എം പി,ഡോക്ടർ സജീഷ്. എം എന്നിവർ ചേർന്ന് നിർമിക്കുന്നു.
മലയാള സിനിമ ചരിത്രത്തിൽ ആദ്യമായി ഉടലാഴത്തിലൂടെ ഒരു വനിത സംഗീത സംവിധായിക കടന്നു വരുന്നു. മിഥുൻ ജയരാജിനോടൊപ്പം പ്രശസ്ത ഗായിക സിതാര കൃഷ്ണകുമാറാണ് ഈ ചിത്രത്തിൽ സംഗീത സംവിധാനം നിർവഹിക്കുന്നത്. പശ്ചാത്തല സംഗീതമൊരുക്കിയത് ബിജിബാൽ.