കൊച്ചി: കർഷകരിൽനിന്നു നേരിട്ട് സംഭരിച്ച റബർ തായ് ലൻഡ് സർക്കാർ വിറ്റഴിക്കാൻ തുടങ്ങിയതും രാജ്യത്തെ പ്രധാന റബർ ഉത്പാദനമേഖലയിൽ ടാപ്പിംഗ് പുനരാരംഭിച്ചതും വരും ദിവസങ്ങളിൽ രാജ്യാന്തരവിപണിയിൽ പ്രകൃതിദത്ത റബറിന്റെ വിലത്തകർച്ചയ്ക്കു വഴിവച്ചേക്കുമെന്ന് ഇന്ത്യൻ ഫാർമേഴ്സ് മൂവ്മെന്റ് (ഇൻഫാം) ദേശീയ സെക്രട്ടറി ജനറൽ ഷെവലിയർ വി.സി. സെബാസ്റ്റ്യൻ പറഞ്ഞു. ദൗർലഭ്യംമൂലം വ്യവസായികൾ സ്വാഭാവിക റബർ ഇറക്കുമതി ചെയ്യുമ്പോൾ റബർബോർഡ് റബർ കയറ്റുമതിചെയ്യുന്നതിന്റെ വൻ കണക്കുകളുമായി വന്നിരിക്കുന്നത് വിരോധാഭാസമാണ്. കർഷകനെ മറന്ന് വ്യവസായികളുടെയും വൻകിട വ്യാപാരികളുടെയും ഏജന്റുമാരായി റബർബോർഡ് അധപതിക്കുന്നത് അപമാനകരമാണന്നും വി.സി. സെബാസ്റ്റ്യൻ പറഞ്ഞു.