ചിരഞ്ജീവി നായകനായ സെയ്റ നരസിംഹ റെഡ്ഡി കണ്ട ഏഴ് പോലീസ് ഉദ്യോഗസ്ഥർക്ക് സസ്പെൻഷൻ. ആന്ധ്രപ്രദേശിലാണ് സംഭവം. ജോലി സമയത്താണ് ഇവർ കൂട്ടത്തോടെ സിനിമ കാണാൻ പോയത്. തീയറ്ററിൽ ഇരിക്കുന്ന സെൽഫി കൂട്ടത്തിലൊരാൾ പകർത്തി സോഷ്യൽമീഡിയയിൽ പങ്കുവച്ചതോടെയാണ് സംഭവം അധികൃതരുടെ ശ്രദ്ധയിൽപ്പെട്ടത്.
സിനിമ റിലീസായി ആദ്യ ദിവസം ആദ്യ ഷോയ്ക്കാണ് ഇവർ ഏഴ് പേരും പോയത്. ജില്ലയിലെ വ്യത്യസ്ത പോലീസ് സ്റ്റേഷനുകളിൽ ജോലി ചെയ്യുന്ന ഇവർ ഏഴ് പേരും അവധിക്ക് അപേക്ഷിച്ചിരുന്നില്ല. തുടർന്ന് കോയിൽകുന്തള എന്ന സ്ഥലത്ത് എത്തിച്ചേർന്ന് ഇവർ സിനിമ കാണുകയും ചെയ്തു.
പോലീസുദ്യോഗസ്ഥർ തീയറ്ററിൽ ഇരിക്കുന്ന ചിത്രം കണ്ട കുർണൂൽ എസ്പി കെ. ഫക്കീരപ്പ നടപടി സ്വീകരിക്കുവാൻ ആവശ്യപ്പെടുകയായിരുന്നു. ഗാന്ധിജയന്തിയോട് അനുബന്ധിച്ച് പോലീസ് സേനയിൽ വളരെയധികം തിരക്കുള്ള ദിനമായിരുന്നു ഒക്ടോബർ 2. കൂടാതെ ആന്ധ്രാപ്രദേശിൽ നിരവധി വില്ലേജ് സെക്രട്ടേറിയറ്റിന്‍റെ പ്രവർത്തനം ആരംഭിക്കുന്നതും ഈ ദിനമായിരുന്നു.
അനുമതിയില്ലാതെ അവധിയെടുത്ത് ഏഴുപേരും സിനിമ കാണുവാൻ പോയതാണ് ഉന്നത ഉദ്യോഗസ്ഥർ നടപടി സ്വീകരിക്കുവാൻ കാരണമായത്.
