മലയാളത്തിലെ എക്കാലത്തേയും മാസ് ചിത്രങ്ങൾ സമ്മാനിച്ച സിനിമ ലൊക്കേഷനാണ് വരിക്കാശേരി മന . വരിക്കാശേരി മന എന്നു കേൾക്കുന്പോൾ പ്രേക്ഷകരുടെ മനസ്സിൽ ആദ്യം എത്തുന്നത് ദേവാസുരം, ആറാം തന്പുരാൻ, നരസിംഹം പോലെയുള്ള മാസ് ചിത്രങ്ങളാണ്.
മോഹൻലാലിനു മാത്രമല്ല മമ്മൂട്ടിയുടെ സിനിമ ജീവിതത്തിലും വരിക്കാശേരി മന ഹിറ്റുകൾ സമ്മനിച്ചിട്ടുണ്ട്. രാപ്പകൽ, ദ്രോണ എന്നീ ചിത്രങ്ങളുടെ പ്രധാന ലൊക്കേഷൻ വരിക്കാശേരി മനയായിരുന്നു. ഈ ചിത്രങ്ങളെല്ലാം സൂപ്പർ ഹിറ്റുമായിരുന്നു. ഇപ്പോഴിതാ വീണ്ടും മമ്മൂക്ക വരിക്കാശേരി മനയിൽ എത്തുകയാണ്. താരത്തിന്റെ ചിത്രം സമൂഹമാധ്യമങ്ങളിൽ വൈറലാണ്.
അജയ് വാസുദേവ് സംവിധാനം ചെയ്യുന്ന ഷൈലോക്കിന്റെ ലൊക്കേഷൻ ചിത്രമാണ് ഇപ്പോൾ പുറത്തു വന്നിരിക്കുന്നത്. കറുപ്പ് വസ്ത്രം ധരിച്ച് മാസ് ലുക്കിൽ വരിക്കാശേരി മനയുടെ പൂമുഖത്ത് ചാരുകസേരയിൽ ഇരിക്കുന്ന മമ്മൂക്കയാണ് ചിത്രത്തിൽ. അണിയറ പ്രവർത്തകർ പുറത്തു വിടാത്ത ഈ ചിത്രം സമൂഹമാധ്യമങ്ങളിൽ വൈറലാവുകയാണ്. എന്തായാലും ചിത്രത്തിൽ ഗംഭീര ലുക്കിലാണ് മമ്മൂക്ക എത്തുന്നതെന്ന് വ്യക്തമാണ്. ചിത്രത്തിന്റെ ഷൂട്ടിങ് പുരോഗമിക്കുകയാണ്.
ഷൈലോക്ക് മാസ് ആക്ഷൻ ഫാമിലി ചിത്രമാണ്. സംവിധായകൻ അജയ് വാസുദേവ് തന്നെ ചിത്രത്തിനെ കുറിച്ച് വെളിപ്പെടുത്തിയിരുന്നു. അബ്രാഹമിന്റെ സന്തതികൾ, കസബ എന്നീ ചിത്രങ്ങൾക്ക് ശേഷം ഗുഡ്വിൽ എന്റർടെയ്മെന്റാണ് ചിത്രം നിർമ്മിക്കുന്നത്. മമ്മൂട്ടിയെ നായകനാക്കി ഗുഡ് വിൽ ബാനർ നിർമ്മിക്കുന്ന മൂന്നാമത്തെ ചിത്രമാണിത്.
ചിത്രത്തിൽ മീന ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.രാജ്കിരണ്, ബിബിൻ ജോർജ്ജ്, ബൈജു സന്തോഷ്, സിദ്ദിഖ്, കലാഭവൻ ഷാജോണ്, ഹരീഷ് കണാരൻ, ജോണ് വിജയ് എന്നിവരാണ് മറ്റു താരങ്ങൾ. അനീഷ് ഹമീദ്, ബിബിൻ മോഹൻ എന്നിവർ ചേർന്നാണ് ചിത്രത്തിന്റെ തിരക്കഥ തയാറാക്കിയിരിക്കുന്നത്.