അങ്കമാലി ഡയറീസ് മറാത്തി ഭാഷയിൽ റീമേക്ക് ചെയ്യുമെന്ന് റിപ്പോർട്ട്. 86 പുതുമുഖങ്ങളെ അണിനിരത്തി ലിജോ ജോസ് പെല്ലിശ്ശേരി മലയാളത്തിൽ സംവിധാനം ചെയ്ത ചിത്രമാണ് അങ്കമാലി ഡയറീസ്. ലിജോ അങ്കമാലിയിലൂടെ അവതരിപ്പിച്ച ആന്റണി വർഗീസും അപ്പാനി ശരത്തും ടിറ്റോ വിൽസണുമൊക്കെ ഇന്ന് മലയാളസിനിമയിൽ ശ്രദ്ധിക്കപ്പെടുന്ന നിരയിലേക്ക് ഉയർന്നുകഴിഞ്ഞു. ഇപ്പോഴിതാ അങ്കമാലി ഡയറീസ് മറാത്തി ഭാഷയിൽ റീമേക്ക് ചെയ്യുന്നു. കോലാപൂർ ഡയറീസ് എന്നാണ് മറാത്തി റീമേക്കിന് പേരിട്ടിരിക്കുന്നത്.
ഗായകൻ, സംഗീത സംവിധായകൻ എന്നീ നിലകളിൽ കൂടി ശ്രദ്ധിക്കപ്പെട്ട മറാത്തി സംവിധായകൻ അവധൂത് ഗുപ്തെയും വജീർ സിംഗും ചേർന്നാണ് ചിത്രം സംവിധാനം ചെയ്യുന്നത്. പ്രമുഖ ട്രേഡ് അനലിസ്റ്റ് തരണ് ആദർശ് ആണ് ട്വിറ്ററിലൂടെ ഇക്കാര്യം അറിയിച്ചത്.
അതേസമയം ഈ.മ.യൗവിന് ശേഷം ഒരുക്കുന്ന ജല്ലിക്കെട്ട് എന്ന സിനിമയുടെ അണിയറപ്രവർത്തനങ്ങളിലേക്ക് കടന്നിരിക്കുകയാണ് ലിജോ ഇപ്പോൾ.