ബംഗളൂരു: സംസ്ഥാനത്ത് ഇടിമിന്നൽ മുൻകൂട്ടി അറിയാൻ ഇനി മൊബൈൽ ആപ്പ്. സിദിലു എന്ന ആപ്പ് വഴി ഇടിയും മിന്നലും ഉണ്ടാകുന്ന സ്ഥലത്തെക്കുറിച്ചുള്ള മുന്നറിയിപ്പ് ലഭിക്കും. യുഎസ് ആസ്ഥാനമായുള്ള എർത്ത് നെറ്റ്വർക്സ് കന്പനിയുമായി സഹകരിച്ച് കർണാടക പ്രകൃതിദുരന്ത നിരീക്ഷണകേന്ദ്രമാണ് ആപ്പ് തയാറാക്കിയത്. സംസ്ഥാനത്ത് മിന്നൽ മുൻകൂട്ടി അറിയുന്നതിനായി എർത്ത് നെറ്റ്വർക്സ് കന്പനി സ്ഥാപിച്ചിട്ടുള്ള 11 കേന്ദ്രങ്ങളിൽ നിന്നുള്ള വിവരങ്ങളാണ് ആപ്പ് വഴിയായി ലഭിക്കുന്നത്.
ഇടിമിന്നൽ ഉണ്ടാകുന്നതിന് 20 മുതൽ 45 വരെ മിനിറ്റ് മുന്പ് ആപ്പിലൂടെ മുന്നറിയിപ്പ് ലഭിക്കും. സ്ഥലപരിധി അനുസരിച്ച് വിവിധ നിറങ്ങളിലൂടെയാണ് മുന്നറിപ്പ് നല്കുന്നത്. ഒരു കിലോമീറ്റർ ചുറ്റളവിലുള്ള ഇടിമിന്നലിന് ചുവപ്പും അഞ്ചുകിലോമീറ്റർ ചുറ്റളവിലുള്ളതിന് ഓറഞ്ചും 15 കിലോമീറ്റർ ചുറ്റളവിനുള്ളിൽ മഞ്ഞയും സുരക്ഷിത മേഖലയിലാണെങ്കിൽ പച്ചയും നിറത്തിലുള്ള മുന്നറിയിപ്പാകും ലഭിക്കുക. ഗൂഗിൾ പ്ലേസ്റ്റോറിൽ നിന്ന് ആപ്പ് ഡൗണ്ലോഡ് ചെയ്യാനാകും.
മിന്നൽ മുന്നേ അറിയാം; ആപ്പുമായി കർണാടക
10:19 PM May 02, 2019 | Deepika.com