ജിബു ജേക്കബ് എന്‍റർടെയ്ൻമെന്‍റിന്‍റെ ബാനറിൽ സിന്‍റോ സണ്ണി കഥയും തിരക്കഥയെഴുതി സംവിധാനം ചെയ്യുന്ന "99ക്രൈം ഡയറി" എന്ന ചിത്രത്തിന്‍റെ ഒഫീഷ്യൽ ട്രെയിലർ സൈന മൂവീസ് യൂട്യൂബ് ചാനലിൽ റിലീസായി.
ശ്രീജിത്ത്‌ രവി, വിയാൻ മംഗലശേരി, ഗായത്രി സുരേഷ്, പയസ്, ഫർസാന, പ്രമോദ് പടിയത്ത്, ധ്രുവ് നാരായണൻ, സുമ ദേവി, ഷിബു ലാസർ തുടങ്ങിയവരാണ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.
പൂർണമായും കോവിഡ് കാലത്ത് ചിത്രീകരണം പൂർത്തീകരിച്ച ചിത്രം ഒരു ക്രൈം ത്രില്ലർ ആണ്. 1999ലെ ആദിവാസി വനമേഖലയിലെ ഭൂസമരവുമായി ബന്ധപ്പെട്ട കഥപറയുന്ന ചിത്രം തുടർച്ചയായ കൊലപാതകങ്ങളുടെ വർത്തമാനകാലം ചർച്ച ചെയ്യുന്നു. നക്സൽ ലൂയി എന്ന ശക്തമായ കഥാപാത്രത്തെയാണ് ശ്രീജിത്ത്‌ രവി അവതരിപ്പിക്കുന്നത്.
സംവിധായകനും നിർമാതാവുമായ ജിബു ജേക്കബിന്‍റെ സംവിധാന സഹായിയായി പ്രവർത്തിച്ചുവരുന്ന സിന്‍റോ സണ്ണി 2015ൽ പുറത്തിറക്കിയ 'നൂൽപ്പാലം 'എന്ന ചിത്രത്തിനു ശേഷം സംവിധാനം ചെയ്യുന്ന ചിത്രം കൂടിയാണ് '99 ക്രൈം ഡയറി'.
