ഇൻസ്റ്റഗ്രാമിൽ അക്കൗണ്ട് തുടങ്ങി നടി കാവ്യ മാധവൻ. താരം തന്നെയാണ് ഇൻസ്റ്റഗ്രാം പ്രൊഫൈലിന്റെ ലിങ്ക് സഹിതം നൽകി സന്തോഷവാർത്ത ആരാധകരെ അറിയിച്ചത്. കാവ്യ മാധവൻ ഓഫീഷ്യൽ എന്നാണ് ഇൻസ്റ്റഗ്രാമിൽ പേര് നൽകിയിരിക്കുന്നത്.
കസവുസാരിയുടത്ത് ചിങ്ങമാസപുലരി ആശംസകളുമായാണ് ആദ്യ പോസ്റ്റിൽ താരം എത്തിയത്. ചിങ്ങമാസത്തിന്റെ ചാരുതയിൽ പൂവണിയട്ടെ ഓരോ മനസുകളും. പുതിയൊരു പൂക്കാലത്തെ വരവേൽക്കാൻ ഒരുങ്ങുന്ന പ്രിയപ്പെട്ടവർക്ക്, ഹൃദയം നിറഞ്ഞ ഓണാശംസകൾ. കാവ്യ കുറിച്ചു.
കാവ്യയുടെ ഉടമസ്ഥതയിലുള്ള ലക്ഷ്യയുടെ സാരിയാണ് താരം അണിഞ്ഞിരിക്കുന്നത്. ഇതിനൊപ്പം മെറൂൺ കളർ ബ്ലൗസാണ് പെയർ ചെയ്തത്. ഫെയ്സ്ബുക്കിൽ 48 ലക്ഷം ആരാധകരുളള കാവ്യ മാധവൻ സോഷ്യല്മീഡിയയില് അത്ര സജീവമല്ലെങ്കിലും താരത്തിന്റെ പുതിയ വിശേഷങ്ങളെല്ലാം ആരാധകര് ആഘോഷമാക്കാറുണ്ട്.
2016ൽ റിലീസ് ചെയ്ത ‘പിന്നെയും’ എന്ന അടൂർ ഗോപാലകൃഷ്ണൻ ചിത്രത്തിലാണ് കാവ്യ അവസാനമായി അഭിനയിച്ചത്. 2019 ഒക്ടോബറിലാണ് ദിലീപിനും കാവ്യയ്ക്കും പെൺകുഞ്ഞ് ജനിക്കുന്നത്. മഹാലക്ഷ്മി എന്നാണ് പേര്.