വൈര എന്റർടെയിൻമെൻസിന്റെ ബാനറിൽ മോഹൻ ചെറുകുരിയും ഡോ. വിജേന്ദർ റെഡ്ഡി ടീഗലയും ചേർന്ന് നിർമിക്കുന്ന പുതിയ ചിത്രമാണ് മട്ക. പാൻ ഇന്ത്യൻ ചിത്രമായി ഒരുക്കുന്ന മട്ക സംവിധാനം ചെയ്യുന്നത് കരുണ കുമാർ ആണ്. ബോളിവുഡ് നടിയും നർത്തകിയുമായ നോറ ഫത്തേഹിയാണ് ചിത്രത്തിലെ നായിക.
സിനിമയുടെ ലുക്ക് ടെസ്റ്റുമായി ബന്ധപ്പെട്ട് നിലവിൽ ഹൈദരാബാദിലാണ് നോറ ഫത്തേഹിയുള്ളത്. ലുക്ക് ടെസ്റ്റിന് ശേഷം വർക്ഷോപ്പിലും താരം പങ്കെടുത്തു. തെലുങ്ക് യുവ താരനിരയില് ശ്രദ്ധേയനായ വരുൺ തേജ് ആണ് ചിത്രത്തിലെ നായക കഥാപാത്രത്തെ അവതരിപ്പിക്കുന്നത്.
വരുൺ തേജിന്റെ ആദ്യ പാൻ ഇന്ത്യൻ സിനിമ കൂടിയാണ് മട്ക. തെലുങ്ക്, തമിഴ്, കന്നട, മലയാളം, ഹിന്ദി എന്നീ ഭാഷകളിലാണ് ചിത്രം റിലീസ് ചെയ്യുക. നോറ ഫത്തേഹിക്ക് പുറമെ മീനാക്ഷി ചൗധരി ചിത്രത്തിൽ മറ്റൊരു നായികയാണ്.
നവീൻ ചന്ദ്ര, കന്നട നടൻ കിഷോർ എന്നിവരാണ് മറ്റ് പ്രധാന വേഷങ്ങൾ കൈകാര്യം ചെയ്യുന്നത്. 1958 -1982 കാലഘട്ടത്തിൽ നടക്കുന്ന കഥയാണ് മട്ക പറയുന്നത്. അറുപതുകളിലെ വിശാഖപട്ടണത്തെ ചിത്രീകരിക്കുന്നതിനായി കൂറ്റൻ വിന്റേജ് സെറ്റാണ് അണിയറ പ്രവർത്തകർ ഒരുക്കുന്നത്.
സംവിധായകൻ കരുണ കുമാർ തന്നെയാണ് ഈ ചിത്രത്തിന്റെ കഥ, തിരക്കഥ, സംഭാഷണം എന്നിവ നിർവഹിക്കുന്നത്. ചിത്രത്തിന്റെ കലാസംവിധാനം നിർവഹിക്കുന്നത് സുരേഷ് ആണ്.
പ്രിയ സേത്ത് ആണ് ചിത്രത്തിന്റെ ഛായാഗ്രഹണം നിർവഹിക്കുന്നത്. എഡിറ്റിംഗ് കാർത്തിക ശ്രീനിവാസ് ആർ. തെന്നിന്ത്യയിലെ ഏറ്റവും തിരക്കുള്ള സംഗീത സംവിധായകരിൽ ഒരാളായ ജി.വി. പ്രകാശ് കുമാറാണ് സംഗീതം ഒരുക്കുന്നത്. പിആർഒ : ശബരി.