കോട്ടയം: റോഡുകളെ സംബന്ധിച്ചു പൊതുജനങ്ങൾക്കു പരാതി അറിയിക്കാൻ മൊബൈൽ ആപ്പ് സംവിധാനം പൊതുമരാമത്ത് വകുപ്പ് നടപ്പിലാക്കുന്നു. ഇനി ജില്ലയിലെ റോഡുകളെ സംബന്ധിച്ചുള്ള പരാതി ആപ്പിലൂടെ അറിയിക്കാം. ആപ്പ് വഴി ലഭിക്കുന്ന പരാതികൾ എസ്എംഎസ് വഴിയും ഇ മെയിൽ വഴിയും ബന്ധപ്പെട്ട വിഭാഗം എൻജിനിയർമാരെ അറിയിക്കും.
പരാതി പരിഹരിച്ചതിനുശേഷം വിവരം ആപ്പിൽ അപ്ഡേറ്റ് ചെയ്യും. പരാതി നൽകിയവർക്ക് ആപ്പിലൂടെ തുടർവിവരങ്ങൾ അറിയാൻ സാധിക്കും. റോഡുകളുടെ പരിപാലനം കൂടുതൽ ജനകീയമാക്കാൻ മൊബൈൽ ആപ്പിലൂടെ സാധിക്കുമെന്നാണു പ്രതീക്ഷിക്കുന്നത്.
ജൂണ് ഏഴു മുതൽ ആപ്പ് ഗൂഗിൾ പ്ലേ സ്റ്റോറിലും ആപ്പിൾ സ്റ്റോറിലും ലഭ്യമാകും. പൊതുമരാമത്ത് റോഡുകളുടെയും ആസ്തികളുടെയും ശാസ്ത്രീയമായ സംരക്ഷണത്തിനും കൃത്യമായ ധനവിനിയോഗത്തിനും വേണ്ടി നടപ്പിലാക്കുന്ന റോഡ് മെയിന്റനൻസ് മാനേജ്മെന്റ് സിസ്റ്റത്തിന്റെ (ആർഎംഎംഎസ്)ഭാഗമായാണു പൊതുജനങ്ങൾക്ക് പരാതി അറിയിക്കാനുള്ള ആപ്പ് ഒരുങ്ങുന്നത്. ശാസ്ത്രീയമായ രീതിയിൽ സോഫ്റ്റ്വെയറുകളുടെ സഹായത്തോടെ റോഡുകളുടെ പരിപാലനം സാധ്യമാക്കുന്ന രീതിയാണിത്. ഇതുവഴി അറ്റകുറ്റപ്പണി നടത്തേണ്ട റോഡുകൾ കണ്ടെത്താനും നിലവിൽ അനുവദിച്ച പദ്ധതി വിഹിതത്തിനുള്ളിൽ പണികൾ പൂർത്തിയാക്കാനും സാധിക്കും.
റോഡുകളെ സംബന്ധിച്ചു പരാതി അറിയിക്കാൻ മൊബൈൽ ആപ്പ്
10:01 PM May 24, 2021 | Deepika.com