കിണറ്റില് വീണ വയോധികയ്ക്ക് തുണയായി അഗ്നിരക്ഷാസേനയും പോലീസും
12:48 AM May 22, 2021 | Deepika.com
ചെറുപുഴ: കിണറില് വീണ വയോധികയെ അഗ്നിരക്ഷാ സേന യും ചെറുപുഴ പോലീസും ചേര്ന്ന് രക്ഷപ്പെടുത്തി. മുളപ്രയിലെ കളപ്പുരയ്ക്കല് തങ്കമ്മ (73) യാണ് അപകടത്തില്പ്പെട്ടത്. ഇന്നലെ ഉച്ചയ്ക്ക് പന്ത്രണ്ടരയോടെയാണ് സംഭവം. വെള്ളം കോരുന്നതിനിടയില് കയര് കാലില് കുരുങ്ങി ബാലന്സ് തെറ്റിയതാണ് അപകടകാരണമെന്ന് പറയുന്നു. വിവരമറിഞ്ഞ് ഓടിയെത്തിയ ബന്ധുവായ യുവാവ് വിനോദ് ഉടന് തന്നെ കിണറില് ഇറങ്ങി തങ്കമ്മയെ താങ്ങി പിടിക്കുകയും കയറില് കെട്ടിയിറക്കിയ കസേരയില് സാഹസികമായി ഇരുത്തുകയും ചെയ്തു. വിവരമറിഞ്ഞ് ചെറുപുഴ എസ്ഐ എം.പി. വിജയകുമാറിന്റെ നേതൃത്വത്തില് പോലീസ് സംഘവും പെരിങ്ങോത്ത് നിന്ന് സ്റ്റേഷന് ഓഫീസര് ശ്രീനാഥിന്റെ നേതൃത്വത്തില് ഫയര് ഫോഴ്സ് സംഘവും എത്തി കിണറില് നിന്ന് തങ്കമ്മയെ രക്ഷപ്പെടുത്തി ആശുപത്രിയിൽ എത്തിക്കുകയായിരുന്നു. കാര്യമായ പരിക്കില്ല.