ചിങ്ങവനം: പാക്കിൽ സെന്റ് തോമസ് യാക്കോബായ സുറിയാനി പള്ളിയിലെ നേർച്ചപ്പെട്ടി കുത്തി തുറന്നു മോഷ്ടാക്കൾ പണം അപഹരിച്ചു. ഇന്നലെ പുലർച്ചെ 2.30നാണു മോഷണം നടന്നതെന്നു കരുതുന്നു.
പുലർച്ചെ പള്ളി പരിസരത്തെ ലൈറ്റ് അണയ്ക്കുവാനെത്തിയ കമ്മിറ്റിയംഗം ജോണ് വാലയിൽ സിസിടിവി കാമറകൾ തകർത്തനിലയിൽ കണ്ടതോടെയാണു മോഷണവിവരം അറിയുന്നത്. തുടർന്നു നടത്തിയ പരിശോധനയിൽ പള്ളിയുടെ തെക്കുവശത്തെ വാതിലിന്റെ ഓടാന്പൽ തകർത്ത നിലയിലും കാണുകയായിരുന്നു. തുടർന്നു പള്ളി വികാരിയെയും മറ്റു കമ്മിറ്റിയംഗങ്ങളെയും വിളിച്ചു വരുത്തുകയായിരുന്നു.
പള്ളിക്കകത്തിരുന്ന നേർച്ചപ്പെട്ടിയിലെ പണമാണ് അപഹരിച്ചത്. മുൻവശത്തുണ്ടായിരുന്ന നേർച്ചപ്പെട്ടി തുറക്കാൻ ശ്രമിച്ചെങ്കിലും സാധിച്ചില്ല. നാല് സിസിടിവി കാമറകൾ തകർത്ത നിലയിലാണ്. സംഭവത്തെത്തുടർന്നു ചിങ്ങവനം പോലീസ് സ്ഥലത്തെത്തി പരിശോധന നടത്തി. 10,000 രൂപ നഷ്ടപ്പെട്ടതായാണു കരുതുന്നത്. ദിവസങ്ങൾക്കു മുന്പ് കൊല്ലാട് സെന്റ് പോൾസ് പള്ളയിലെ രണ്ടു നേർച്ചപ്പെട്ടികൾ തകർത്ത് മോഷ്ടാക്കൾ പണം അപഹരിച്ചിരുന്നു. പള്ളിയുടെ പരിസരങ്ങളിൽ സ്ഥാപിച്ചിരുന്ന മുഴുവൻ സിസിടിവി കാമറകളും തകർത്തശേഷമായിരുന്നു മോഷണം.
പാക്കിൽ യാക്കോബായ പള്ളിയിലെ നേർച്ചപ്പെട്ടി കുത്തിത്തുറന്നു മോഷണം
11:08 PM May 06, 2021 | Deepika.com